واهو جه رمضان
أغنيه جديده
كلمات : أشرف يوسف
واهو جه رمضان
وهنرجع تاني نجيب فوانيس
والخاله سعاد
تصحي ومن بدري تقوم تنده
علي أم ونيس
وفطور وسحور وصيام وحاجات
كنا اتعودنا عليها زمان
مع تليفزيون وإذاعه تقول
وتقدم شيخ يقرا القران
وآدان المغرب نستغفر
ونقول بعديه الله أكبر
ونبل الريئ بتلات بلاحات
مع كاس ميه وبعدين نفطر
والحلو كنافه وقمر الدين
وقطايف وحاجات م التانيه
بناكلها وبعدين نتوضي
ونريح لنا كدا كام ثانيه
والشيخ بعد شويه يأذن
ونقوم لصلاة التراويح
العشا بنصليها جماعه
ونعيش مع همس التسابيح
والطبله تدور م الساعه اتنين
في الحاره وينده عمي خميس
قوم صحي النوم ياعماد يافؤاد
ياكمال ياجمال ياجلال ياونيس
نتسحر والفجر يأذن
نتوضي ونسبأ يا جماعه
الصف الأول عارفينه
بنكبر ونصلي جماعه
واهو ده رمضان
بجمال صلواته وقرآنه
يا جمال لياليه
جه وقته وآن تاني آوانه
ياجمال لياليه
جه وقته وآن
تاني آوانه
الثلاثاء بتاريخ ٢٠٢٢/٣/١٥م
بقلم الشاعر : أشرف يوسف
من ديوان : شاعر و مشاعر
التعليقات مغلقة.