وبـاء بـوبـاء
ـ قلم أسـمـاء الـبـيـطـار
من أكتر المظاهر الغريبة دلوقتي و في عز” سُعار ” الأزمة اللي إحنا فيها دي كوفيد_19 ، أو الكورونا .
و اللي تقريباً ما فيش منطقة ، أو شارع ، أو حي ، أو عمارة ، أو بيت بيخلوا منها .
إلا إن معظم البلد بقت أرض للنفايات !
مظهر صعب جداً إنك طول ما انت ماشي مش شايف على الأرض غير ماسكات، و جوانتي مرمية للأسف بطريقة عشوائية في كل مكان !
من كام يوم كان عندي مشوار الصبح يعني خرجت على الساعة التاسعة صباحا .
كان الشارع الرئيسي حقيقي زي الفل و نضيف جدا ، و أول مرة ألاقي حاويات القمامة خارجة تقريباً في مستوى سير العربيات ، و أظن النقطة دي كانت مقصودة من هيئة النظافة .
على الأقل اللي معاه اي مخلفات في عربية يقدر يرميها في السلة بسهولة .
لكن حقيقي المشكلة الأكبر في الشوارع الجانبية .
يعني اكيد حضرتك لما تبقى مقرب توصل بيتك و هيبقى تقريباً على أول الشارع اللي أنت ساكن فيه ، هتروح خالع الكمامة و قالع الجوانتي و راميهم بكل بساطة .
أكيد الشارع ده اللي هو شارعك في الأساس فيه أطفال و أولاد حراس العمارات اللي يمكن معندهمش وعي كافي ، إنهم يمسكوا حاجة زي دي .
أولاد حراس العمارات اللي بيطلعوا عندي و عندك ، و ليهم علاقة باللي رايح و اللي جاي ، و بسكان العمارات اللي يمكن حضرتك ساكن فيها و بتتعامل معاهم عن قرب ، سواء في إحضار بعض الطلبات ، أو تلميع السيارة ، أو مسح السلم ، أو أو أو .
حقيقي كأنهم فرد مننا .
دي حاجة بسيطة ممكن الجميع يتأذى بسببها و السبب ……. !
و لو فضل الوضع كده صدقوني هتبقى قنبلة موقوتة ، لحالات أكثر لا قدر الله .
حقيقي المشكلة دي الجميع دون استثناء في سلة واحدة .
و لازم يبقى وعينا كامل و حقيقي .
و أظن الإعلام مش مقصر في الوعي بالذات من الناحية دي .
يبقى مش فاضل غيرنا .
و من باب ” لا ضرر و لا ضرااار ”
نرجوا أن نكون متحضرين حتى نمر من هذه الأزمة على خير و سلام .
التعليقات مغلقة.