وبنينا الحلم …
السيد ندا
وبنينا الحلم طوبة طوبة
و ف ثانية اتهد
بيقولي بقيتي كدا كركوبة
ومانتيش على القد
وكأني عاصية مليش توبة
والعمر اتسد
خلاني أقول توبة النوبة
شكرا وبجد
،،،،،،،،،،،،،،،،،،،،،،،،،،،
غلطانة جدا لوباتساهل
وباقول عديها
في جراح كتير مش بالساهل
تقدر تداويها
ياما ناس طمَّاعة وأنانية
متشفش إلا اللي ليها
وإن يوم قالوا دي غلطانة
تلاقيها تخبي ف عينيها
،،،،،،،،،،،،،،،،،،،،،،،،،،،،،
فرحانة جدا أنا بفراقنا
ما هو مش معقول
يتساوي خسيس خاين وجبان
مع بنت أصول
أنا عمري ف يوم مااتخيلتني
باهتف وبأقول
خسارة فيك كل اللي كان
قلبي النهاردة مبقاش مسئول
،،،،،،،،،،،،،،،،،،،،،،،،،،،،،،،،،،،،
كان لازم يوم تعرف إني
صاحبة مبدأ
وإن الإحساس لو كان معدن
عمره ما يِصْدَأ
مش وقت عتاب بيني وبينك
ولامين أَصْدق
أنا قلبي خلاص بقى ملك لناس
عندها إحساس صِدْقُه بينطق
،،،،،،،،،،،،،،،،،،،،،،،،،،،،،،،،،،
السيد ندا 🌾🍀
التعليقات مغلقة.