وجبة غذاء.بقلم.مسعد البحراوي
..مساء الخير ياوش الخير
ياقلب كبير مالوش آخر
مساء النور ياواد قلبي
ـ جهزوا نتغدا يامَّه
قومي حضري ياأمل
ـ أبويا قاعد فين
ع العتبه وسط الدار
ـ مسا الجمال ياحجيج
اقعد ياولدي اقعد
أخبار جنابك إيه
ـ الشكر للعاطي
وموزع الأرزاق
أخبار محمد إيه
طمني يابا عليه
من يوم ماسافر مكلمنيش
غير مره
ـ الغربه مره وشينه ياحج
وانا خابر
إن انت صابر
على فراقه لكن إصبر
دنيتنا حكمت وأمرت
إننا نعافر
وعلى قد مابنقدر
بنشكمها.
صحيح يابوي؟
دا جدي جالي في المنام
وقال
قريبا إنه هيجيلك ..
طيب ياولدي
علم ولادك
يصونوا أراضيهم
بحب بعضيهم
ميشتتوش روحهم
علمهم الصلوات
الصلاة نعمه
أغلى من الدنيا ومافيها
الدنيا دي بتظهر ياواد ناعمه
لكنها وف كل نبضه ونفس
تنعم سنانك ويطلع ليها هي انياب
سمي على ولادك
وادعي لي انا وجدك
ـ قول لي يابوي
كيف عودك اللي عزف حنين
وكبرنا نتنهد عليه
لحنك يابوي يروي السنين
وبيِشرح الوجدان
ياعبد الله الغدا جاهز
حاضر يامه تمام جايين
تعالى يابوي وجيب يدك
كيفك ياحجه والصحه؟!
تمام وله ؟!
هههههههههههه
لأ ياولدي أنا تمام
خلي بالك من ولادك و المدام
ـ إلا هم فين صحيح ؟
أم مرتك كت بتكشف
راحوا يتقصوا اللي فيها
أمها وواجب عليها
ـ أيوه طبعاً طب وماله
ربنا يطمنا دايما
طمنيني
غِيتي أخبارها إيه؟
ده سؤال ياوِلد بطني
غيتك هنا أحلى غيَّه
لما بطلع فيها
بلقى
الحمام فرحان وطاير
والبشاير
يبهجوا دايما عنيا
ـ ياجميله وصلبه يامه
فيكي أوجاع بالوراثه
رغم ده طارحه أمل
كل لمسه باخدها منك
فيها طاقه للعمل
والغرق في عيون بهيه
إيه ياخوي مالك ؟!
بتِشعر
وله معمول لك عمل ؟
هههههه
لأ ياأمل الدار ياغاليه
ياللي ضيك
إمتداد من ضي أمي
جوه كل شخص شاعر
والبهيه الملهمه
هي طبعاً الحقيقه
والحديقه والورود
هي ميت مليون طريقه
تحكي عن خُلد وصمود
هي ست الكون بهيه
وعشقها ملهوش حدود
واه يا وِلد الإيه ياعبده
بس هي ؟!
واه ياحَجه عم تغيري!؟
انتي مدرستي اللي ربت
وهي كانت العلام
إنتي فصلتيني ميري
بيها كسرت اللجام
رغم كتر اعداءها صمدت
إدعي يامه ان الشهاده
تكون مصيري
وبيها تلقوا انتو السلام
إدعي من قلبك ياحجه
واه!
ربنا يحميك يا ولدي
ويكرم الناس أجمعين
يحمي وطنك دا انت وطني
وربنا هو المعين
يسعدك ياولد بطني
انت واخواتك آمين
هُدى جت
ـ كيفك يا غاليه
ياللي من غيرك بنغرق
إنتي روح وشهاده عاليه
ماشيه بالإحسان تفرق
طيبه ومحبه وتسامح
طمنيني كيف جنابك
والله زين طول ما انت واخواتك معايا
بين ضلوع أمك وابوك
إنتوا أيامي وصبايا
يحفظك إنت وأخوك
بيكوا تحلى لنا الحياه
تسلمي وتعيشي سالمه
بشرى هلت قمت أجري
أصلها أمسي وفجري
صالبه دايما ليا ضهري
بالدعا وذكر الإله
بركة الدار كلها
خد يابوي
إتصال من أختي زينب
ألو يازينب كيفك
وكيف حالك
مالك يابنتي ساكته ليه اتكلمي
هههههه بشويش يابوي حبه
إديني فرصه انطق
كيفك وكيف أمي وكيف الكل
الكل زي الفل
والوضع كله تمام
وحشاني جداً جداً يابنت الإيه
نفسي أكون بينكم يابوي…
ربنا ييسر أموركوا
خد ياولدي كلم اختك
ـ أيوه ياضعيفه ومهاجره
ياقلب بيضخ انتماء
طول حياتك وانتي قادره
تحولي الأحلام حقيقه
وتعزفي لحن الوفاء
كيفك انت وكيف عيالك
كل مابشوف ولدي يوسف
اقوله كني شايفه خالك
تسلموا وتعيشوا ياما
هاتلي أمي
أيوا يابنت الفؤاد
طال يازينتي انتي البعاد
نفسي اشوفك والولاد
واترمي بحضني عليكم
أيوه يامه وحشني حضنك
صدقيني رغم صورتك
ماتفارقني
بس محتاره ف بعادك
والولاد بحاكيها عنك
كل ليله وكل يوم
ربنا يردك يازينه
كلمي ياجميل خواتك
أمل
أيوه يآجميل المُحيا
ياللي بعدك طال عليا
ياأمل بالله عليكي
متقديش أشواقي فيا
وهي قايده لحالها أصلا
نفسي آكل من إيديكي .
واه يابنت الإيه ياحُبي
بس هِمي انتي وتعالى
وما عليكي
هههههههههههه
ربنا يجمع مابينا
هاتي هاتي
ياحياتي يارفيقة ذكرياتي
ياهدى وحشاني جداً
يعلم المولى اني عايشه
كل وقتي ف ذكريات
فاكره لما كنا نحكي
واحنا مع بعض حكايات
وروايات
واللي بحلم به البنات
فاكره طبعاً
كيف راح انسى
فاكره لما الدار بتنعس
واحنا نايمين جنب بعض
كنا طول الليل بنهمس
بالغنى
لحد مايبدأ صباحنا
بأحلى فرض
بشرى عندك أيوه اهي
..عامله إيه يا بنت أختك
ياه على الغربه وسنينها
ربنا يبارك في عمرك
ويغني كل الخلق عنها
بُشرتي وحبيبتي إنتي
محتاجالك ولدعاكي
ربنا يبارك حياتك
سلمي لي ع العيال
وترجعيلنا بالسلامه
بالسلامه
إلاّ كيف ياواد كبيرتك…
فاطمه مبتظهرش ليه
ٕـ خير يابوي
نسيت أقول لك
إنها مشغوله حبه
عندها أشغال كتير
وِلدها شاردين هبابه
نرجوا أللّه تكون سحابه
وتنكشح من ع القلوب
كلكم قولوا أمين
مين على الباب عم يخبط
إفتح ياعبده أنا ياسين
ـ أهلاً ياسين
فينك يا خويا من يومين
معلش مشغول حبتين
خير بس طمني عليك
أبدا ياغالي
الحج بس
العافيه ناقصه شويتين
طمن فؤادك ياولد
سلمها له وإليه
هو المعين هو السند
نرمي تُكالنا عليه
فرفش يابيه واضحك بقى
هههههههههههه
تعا يا ياسين
مساء الخير يا أهل الدار
يديم لمتكوا ليل ونهار
ويسعدكم
يااهلي وعزوتي وناسي..
مساك أنوار ياواد ياياسين
كيف امك والسند تبعك
بخير ياخالتي زين والله
اللي جابني الحين سلامهم
يسلموا ويعيشوا يابني
يابنات العم كيفكم
نحمد الله ياياسين
مبسوطين ان انت بيننا
تسلموا وتعيشوا دايما
جهزوا الأكل لياسين
ماشي حاضر
عمي سمعنا كلامك
واحكي عن بيتنا القديم
ياياسين ياولدي إنسى
عيش حياتك
والحق القطر اللي فاتك
يابني وصيتك وصيه
إوعى تفنيك ذكرياتك
حاضر ياعم
بحق طول عمرك حكيم
أيوه ياعبد الله قول لي
ناوي ترحل م البلد ؟!
لا ياحبيب
انا بزرع الأرض وبعيش
معايا زي ممعاييش
راضي مسلم حالي له
ربك يبارك يابطل..
ـ ياياسين
ـ أخبار حبيبتك إيه
لساك بتتغزل
هههههه
اسكت لابوك يسمع
والله لولا الحال
لاخطبها من دا الحين
واهو انت خابر صح عن خيك
ـ هتروق وتحلى ياواد
هِم انت واتجدعن
وامشي ف سبيل الله
من ضل عنه تاه
وانت سِيد العارفين
خابر ياواد يياسين
مفارقش بالي قاعدة التوته
واحنا بنكتب بكره في الحواديت
كانت القلم والحبر والنوته
والله غير ضلها وجوها ماهويت
براها ياد يا ياسين حدوته ملتوته
كل اللي سمعوها ما شافوا غير توابيت
ياعبد الله.
كانت أيام
محمد سابنا وحياتنا ماخلت حد خالي البال
يا صاحبي الغربه في بيوتنا طالتنا وبدلت لَحَْوال
معادش الحال هو الحال
لازم ولابد نتغرب عشان نرضي الحياه ونعيش…
بقلم
مسعد البحراوي
التعليقات مغلقة.