وجع الحنين بقلم مصطفى كرم
يا زفرة آه جوه صدر الحنين
محتاجة تخرج بره سجن الأنين
تصرخ كفاية حرمان السنين
الروح مصلوبة ف الجسد الحزين
محروم أنا وحلمي قدام العين
بحلم اضم الأمل ضمة العاشقين
احضن معاه الفرح ونور يعلا الجبين
أسمع صوت الهوى يطرب الهايمين
وأيد تعزف علي وتر القلوب
ترنيمة عشق تطفي نار المشتاقين
بس خايف ابوح بالهوى
وأخسره في غمضة عين
كل واحد فينا خايف م الكلام
وجوه منا بحر فايض بالحنين
قول يا قلبي كفاك سكات
ألمح عنيها تقول خلينا كويسين
اللي بينا حاجة حلوة نحسها
بس مكتوب علينا نكون محرومين
إزاي نغير في الحياة حظنا
واحنا بقيود الحياة متكبلين
مخنوقة فينا كل لحظة صفا
نوهب حياتنا للسعادة واحنا مجروحين
زي شمعة تنحرق في ليل السهر
تنزف دموعها تنور طريق القريبين
أنساني ……خلينا نعيشها ذكري
لما يسرقنا الحنين في ليل حزين
التعليقات مغلقة.