وجوم بقلم أحمد فؤاد الهادي ـ مصر

وجوووووم

وليل طويل .. مافيهوش نجوم

حتى القمر .. ضيه انكسر

وراح ونام ماقدر يقوم

………..

والشمس دخلت جحرها

حطت همومها ف حجرها

وسدت بيبانها بالغيوم

………..

وناس غريبة.. مافيها طيبة

قتلوا البلابل

وملوا الجناين غربان وبوم

……….

وجوووووم

لاعدت شايف .. ولاحتى عارف

ازاى اشوف

داير أصارع .. فى كل شارع

جوايا خوف

مش عارف اشوف

………….

خلوها غابة .. كلك ديابة

وماعادش نافع .. أفضل خروف

اقول وامأمأ .. وانده وادأدأ

ولافجر شأشأ .. ومافيهشى خوف

وازاى هاشوف؟

………

حاولت اغير لجل اللزوم

بطلت امأمأ .. ماعرفت ازوم!!

لملمت همى … وفضلت مرمى

بارضع ف دمى .. ما قدرت أقوم

………

وجووووم

وليل طويل مافيهوش نجوم

ـــــــــــــــــــــــــــــــــــــــــ