وحشتني بقلم مدحت رياض
من وسط دموعي واحزاني
حسيت بحاجاتك واحشاني
بصيت على صورتك والضحكة
واحترت يا عمري في تفسيرك
أنا عارفك موش راجع تاني
ولا عمرك هتبات في سريرك
مع أن الدنيا دي من غيرك
موش حاسينها ولا حاسانا
أيام بتفوت موش حاسبينها
معادتش بتفرق ويانا
بس أمانة
متغيبش من الأحلام عني
في الحلم أنا وأنت يا نور عيني
بنعيش وبنحلم ونغني
بنكمل عمرك في منامي
وأهي ذكرى تحلي في أيامي
وتخف الحمل كتير عني
في الحلم أهي روحك بتجيني
وتطبطب ع العمر الباقي
وساعات على ناس بتوصيني
وساعات بتلملم أشواقي
لما أحضن قلبك وأتمنى
الحلم يطول عمر بحاله
والليل يصبر أيوة وماله
والروح من قربك تتهني
م الليل لليل أنا بستنى
وبشوفك كملاك في الجنة
والضحكة على جبينك آية
وبقوم من نومي ومطمن
وكأنك في الفرشة معايا
التعليقات مغلقة.