وحشتيني…
الشاعر شريف عادل
وحشتيني
واخبارك بقيتي ازاي ؟
وبتنامي فـ وقت الليل ؟
ولساكي بتغلي الشاي
بنار الدمعة عالمنديل ؟
ولسة الطفلة جواكي
بتتفرج على الكارتون ؟
وفستان الفرح لايق
وبيشدك ساعات اللون ؟
ولساكي على النية ؟
بريئة فـ نظرتك للناس
تأثر فيكي اغنية
وعايشة بمبدأ الاحساس
ولسة معندكيش اصحاب
وقافلة الآد فـ فيس بوكك
فلان هيموت ويبقالك
تقولي لصاحبتك فكك
ولسة بتهربي دايماً
من الواقع ومـ الايام
وواخدة بطولة فـ السيما
وفي الفرجة على الافلام
ولسة بتلبسي غامق
وعارف قهوتك سادة
وكل ما تيجي تنسيني
بتفتكريني بزيادة
ولسة مكملة نومك
هلاوس بيا كالعادة
ولما بينتهي يومك
تحسي اللقطة متعادة
ولساكي عشان تبكي
بتبقي عاملة قال نايمة
وقال غرقانة جوه النوم
ومش فـ دموعك العايمة
ولسة الكحل فـ رموشك
بيهرب فـ الدموع ويبوش
شفايفك لسة بهتانة
ومش لايقة فـ لون الروج
ولسة الدمعة بتبيِّت
على خدوك تدفيكي
وتيجي الشمس بتصحي
شعور بايت ومات فيكي
وزي الشمس فـ كسوفك
بتكره تبقى متشافة
ولسة البرد فـ كفوفك
وروحك لسة شفافة
..
التعليقات مغلقة.