ودع قصيدتك بقلم الشاعر / وحيد علي الجمال
ودع قصيدتك
قبل ما تسلم ديوانك
ممنوع تغير شكل صورتك
أو تبدل يوم مكانك
إفرد حروفك فوق الحواجز
اوعاك يكونوا مكسورين
اوعاك تبان أن انت عاجز
أنا في اتجاهك
شمال شمال … يمين يمين
فتش حروفك قبل الدخول
اوعاك يكونوا مجرورين
اثبت محلك حاسب تثور
هتعدي سور هتلاقي سور
الجسر شاخ
و العتمة في آخر النفق
بتربي نور
اتوضى في دمع الشقى
صفر هناك صوت الوبور
الليل شرب من نهر يوسف
مافيش في قبرك حد كافر
حبر القصائد أصله طاهر
لاء طهور
مين سجلك
برهان بيثبت حقهم
الأرض بور
عد اللي واقف في الطابور
اكتب بقى تصريح مرور
النهر بحر و البحر
ضارب في الجسور
كتبك هناك متكتفة
و الضلمة في قلب الشتا
محتاجة حضن و عود بخور
فك الحجاب
عندي صورة م الجواب
خوفك بيكتبلك
هناك آخر وطن
آخر دقائق من رحيلك
قلبك بينكر أي باب
رافض وجودك
أنا مش بديل
سلم خريفك معترف
محضر أدله ومتهم
رتب فصولك
اعمل مواسم للمطر
العطش ممكن يطولك
الشك فاصل
بين ضلوعي و بين ضلوعك
اوعاك تجور
أنا مش موافق ع الرجوع
ارسمني عندك ع الشجر
من غير فروع
لملم بقى وجع السطور
غربل حروف المكفوفين
علمني صمتك الطويل
ان أنت مجهول المصير
أنت بالنسبالي آخر معجزة
و الحب أصبح مستحيل
اختم صلاتك في الكفن
غمض عنيك عشرين سنة
و احكم في حقي ميت سنة
من غير ضمير
التعليقات مغلقة.