ورجعنا من تاني صغيرين… شعر د. إيمان سرايا
ومين ماحلمش يوم يصغر شهور وسنين
نعيد أيام بتوحشنا وليها حنين
وأنا ف حلمي لقيت مصباح علاء الدين
دعكته طلعلي عفروتو سألته : مين؟
رد عليّ و بضحكة و صوت عاليين:
أنا يوبيلكم الفضي يا أصليين!
صحيت م الحلم أتلفت شمال ويمين
لقيت ع الواتس تجميعة لناس حلوين
قالت علياء :مين فيكم يشارك ؟؟ميين ؟
حنتقابل صحاب عِشرة وأحلى سنين
ومر الوقت و بهمة و شوق حاضرين
وشوفنا وشوش حبايبنا وناس غاليين
وحلم بعيد بيتحقق ياناس،،شايفين ؟
وتفسيره….أقول ؟والا أكيد عارفين؟؟
ما دام القلب ده صافي ولسة أمين
تدوم الذكرى لو حتى تمر سنين
تدوم الذكرى لو حتى تمر سنين
التعليقات مغلقة.