ورقة بردي …بقلم محمد سيوفي
أنا جمله على ورقة بردي
في بداية عصر الإنسان
مكتوبه بإصرار وتحدي
بتعلن للظلم العصيان
أنا فعل الماضي إللي زاينكم
ومضارع شاهد بيدينكم
أنا فعل الأمر إللي في دينكم
وإتحط مكاني خبر كان
أنا حاصل ضرب عدد مصري
مكتوب فوق ضهر الشقيان
أنا جمله في سطر خبر حصري
بتعلن عن قهر الغلبان
أنا حرف الجر في كلامكم
وأداة النصب في أفعالكم
أنا كسره واضحه على جبينكم
أنا فاعل مرفوع بأوان
أنا دايمٱ مبني للمجهول
وعلامة × أما أخالفكم
و بكون مضموم ليكم علطول
وعلامة ✓ أما أوافقكم
أنا حرف وساكن في مكاني
مكسور بيعافر ويعاني
منصوب عليه بأغلى معاني
مرفوع في الجمله بتشكيلكم
أنا طرح الخير أنا من يومي
مقسوم لإتنين جوه هدومي
واحد بيجٌمع احلامي
والتاني بيساوي في همومي
التعليقات مغلقة.