وش خشب بـ قلم أسـمـاء الـبـيـطـار
يمكن كتير من الناس اللي بنقابلها ، أو موجودة في حياتنا ،
بنلاقي ليها ملامح جامدة !
و كلام ناشف !
الجواب على أد السؤال !
كلامهم قليل !
لو ماشيين في الشارع ممكن يخبطوا في الحيطة من كتر ما وشهم في الأرض !
و بالبلدي كده زي ما بتقول ” مركبين الوش الخشب ”
ناس كتير بتخاف تقرب منهم ، بتكون عنهم فكرة سيئة من غير حتى ما يتعاملوا معاهم .
نفسهم يقربوا لكن خايفين من رد الفعل .
لكن …
معظم الناس دي على فكرة أطيب خلق الله .
روحها لو عرفتها ما تقدرش تنساها و لا تفارقها .
حنية الدُنيا فيهم .
لكن الوش ده بيستخبوا وراه ، يمكن من اللي شافوه قبل كده .
يمكن قلبهم مش حمل صدمات تانيه .
مش أد خيبة أمل جديدة .
بقوا يخافوا على اللي فاضل فيهم .
ما فيش فيهم طاقة و جهد لوجع جديد .
فقرروا يبعدوا بطريقتهم اللي شافوها مناسبه ليهم .
فبلاش نحكم على حد من مُجرد ملامح ممكن تكون مش حقيقية .
بلاش نحكم على حد إلا لما نقرب من روحه ، مش من وشه .
التعليقات مغلقة.