وصفولي الصبر …
بقلم مدحت رياض
(وصفولي الصبر )
ازاي بيقولوا الصبر جميل
اذا كان في حقيقته
بطعم المر
وفي طول العمر
ان كان بيفوت
فالصبر ده أصعب
شئ بيمر
ويقولوا الصبر ده كاس
مسحور
وانا كل حياتي انقلبت صبر
وقالولي الحزن كما المولود
بيعدي ويصغرشهر ف شهر
ويحل مكان الضلمة النور
ومكان الجرح بيطلع فرح
طب ليه الفرح
صبح برواز بازار مكسور
وتمد الخطوة ورغم العزم
يقابلك سور
وتعيش في الصبر كأنه جراب
على قد اليوم
وساعات من الدمع يكش ويخلص
قبل النوم
فتعيش في ساعات بتلم الذكرى
وتعمل زووم
على لقطة في لحظة تعدي
في صفحة من الألبوم
قلقان من برد فراق محتوم
تتغطى بإيه والعمر ده كله
رياح وغيوم
وبرغم البرد وقهر الجرح
تروح في النوم
وتعيش بتسافر جوة الحلم
كأنه حياة
وتحس في لحظة اتحول فيها
لطوق ونجاة
فالدنيا بيصعب يعني عليها
إنك مرتاح
فتلاقي عيونك فجأة انقلبت
بحر جراح
ويطير النوم على أهون شئ
ممكن تلقاه
على واحد فجأة من الجيران
بيدق الباب
أو حد هياخد منك حالا
كشف حساب
بتكون في الحلم مع الأحباب
بتعيش الغاز
والحلم بيصبح جوة حياتك
ده الانجاز
وتعيش متكدر باقي اليوم
تنسى في لحظات تفاصيل
الحلم كأنه رسوم
انحذفت فجأة مع الصحيان
من عز النوم
وتحس بإنك جوة الدنيا
أمير مهزوم
ومهيش مستاهلة تعافر
فيها وفيها تلوم
البحر غريق والموج لو عالي
هتفرق ايه
ان كنت عبيط
او كنت ياواد
حريف في العوم
التعليقات مغلقة.