وعهد الله …شعر حسن أبو عرب
أنا اللي الخلق تركوني
فى حضن رصيف وكان قاسي
لا يعرف شفقه ولا رحمات
رصيف تارك أثار السحل على جسمي
وناقش فى الضلوع علامات
لهيب شمسه بتكويني
وليل برده مخليني
لا نا نايم ولا صاحي
ولا محسوب على الأموات
لا لاقي هدمه تسترني
ولا مأوى ينجيني من المهانات
يا أهل النخوه فين انتم؟وانا منكم
وعهد الله بينى وبينكم
فليه بتخونوا للأمانات
راح اشكيكم واحاجيكم
فى يوم المشهد الأعظم
على الآهات وع الدمعات
واقول للمولى ياربي
بحق مابيا جيب حقى
مين اللي بيخنق الطيبه
وبدل نورها بالظلمات
التعليقات مغلقة.