“وكان يدوب” شعر..حسن أبوعرب
وكان يَدُوب
باصِص نهار الشقشقَه
وانقَاض دمار
تشبِه رماد المحرقه
واصوات غلابه ومنكوبين
عشقوا الأنين
وخلق واقفه مبحلَقَه
دنيا مزادهَا والعطَا
على مين هيرسَى دا العطَا
والرعب سيطر ع القلوب
واكوَام ذنوب صبحت غطا
ياخلق عايشه ملخبَطَه
شح المطر. زاغ البصر
الكل على حافة خطر
والظلم رافض ينحسر
ياقلوب وكارهه للسلام
صبحت حُطَام متبعزَقَه
آه يازمان الدقدقه
عشقانَا ليه المطرقه
ياقلوبنا امته تفهمي
امته تلينى وتخشعى
وتفوقِى م الوَهم الغبِى
وتحِلِّى حبل المشنقه!!
التعليقات مغلقة.