وليه احتار بقلم جمال زكي عينر
وليه احتار ؟
وبدل الجنة اعيش في النار
وليه افضل عايش في عذاب ؟
واكون كداب
عشان اتفادى مواويلك
وطول ليلك
وتفسيرك وتاويلك لأحوالي
وتفتكري !! حاكون مالي ؟
ده انا ماشي في جنب الحيط
كده ف حالي
عشان الشك ليل ونهار
وغيرتك زايدة قايدة النار
على الفاضي وع المليان
وانا انسان
بكمل عشوتي بنومي
بعيش اتدارى في هدومي
لا انا عايز اكون سلطان
وسي السيد في افلامه
ولاده وراه وقدامه
لكن عايز اكون انسان
تحسي بيا بهمومي
تكوني فرحتي ف يومي
ما انا شقيان
ولكن فرحتي بيكي
وبولادي وحيطان بيتي
تخليني اهد الصخر بايديه
واشق الضلمه بعينيه
لكن غيرتك بتجرحني
تخليني اعيش محني
وانا راجل مانش ملطوط
ولا ف ضهري علامة سوط
ولا عمري في يوم عطيت
ولا خطوة ف غلط خطيت
ولا ولفت على غيرك
وعمري ف يوم ما قلت ياريت
تعالي حبيبتي تعاليلي
تعالي ناحيتي وميلي
تعالي نوري عمري
وقيدي ليا قناديلي
ده انا راجلك وبنده لك
تعالى ف حضنى على مهلك
بلاش الحيرة والغيرة
ده انا سندك وانا اهلك
بلاش الحيرة والغيرة
ده انا سندك وانا اهلك
التعليقات مغلقة.