ومين قالك أنا شاعر بقلم مدحت رياض
ومين قالك أنا شاعر
يا دوب القلب بيعافر
يلم الكلمة تتسطر
حروف من جوة تتعطر
بأشواقي
وخيط من روحي لو باقي
بيلضملك كلام العين
ولو فاضل كمان سطرين
فهتلاقي
ملامح من جمال قلبك
علي حرفي
وموش قادر
لا أقولك تاني
ولا اوفي
يا دوب المعني بيعدي
على روحي
فيلمس آهة في جروحي
فيتمايل
وبرضه الحرف يتحايل
عشان يخرج لقلب النور
وأنا م الحيرة في عيونك
بلف وأدور
ولو هيقولوا من تاني
ان أنا شاعر
خلاص شاعر
بحبك بس بيحرك
كلام يتقال
ويتفصل ميتين غنوة
وميت موال
على القلب آللي حبيته
وحسيته
وخلي العمر ليك ميال
أنا شاعر
إذا حرف الكلام إسمك
ولو هكتب على رسمك
بداية الحب كان ليكي
وبختم في السطور بيكي
كلام الشعر لو يحلى
فيبقى كله في عنيكي
ما انت اللي سطرتي الحروف
مليون ديوان
وانت الهرب من وسط خوف
لعيون امان
وانت اللي حليتي السنين
رغم الظروف
والحزن أصبح من وجودك
فجاة كان
وانا؟؟
أنا الحرف اللي مستني
تحطي النقطة من فوقه
أنا القلب اللي من شوقه
زرع لك في السنين لبلاب
ومتشعبط في شباك الامل
وسحاب
ومستني الندي منك
يغطيني
ويسمع مني لو بحكي
ولو ساكت فيحكيني
انا شاعر بأنك فجاة يا عمري
وحشتيني
التعليقات مغلقة.