ومين قالك تكون انسان… شعر وائل هيبة
ومين قالك تكون انسان
في عصر بيحكمه ديابه
وفين راح تكتب العنوان
وفين تختاره في الغابه
هناك تتكتف الغزلان
وكل وحوشها متسابه
عشان تعرف تعيش هتكون
بناب والكف ضَرَّابه
ومين قالك تكون بضمير
نفوس الحق متعابه
وللغدار ما بين الناس
كرامة وعز ومهابه
وعمرك شفت يا ابن الناس
حمامة في عشه متهابه
وحاير بين حلال وحرام
وليه الخلق كدابه
وبين الخوف من الرحمن
وعشق لدنيا جذابه
خلاص اختار مصيرك فين
دي خيل الفتنة وَثَّابه
يا تبقا شمال يا تبقا يمين
ملايكة ربي كَتَّابَه
يارب ارزقنا صبر جميل
وقوة حق في الغابه
التعليقات مغلقة.