ونقلق ليه… بقلم مسعد البحراوي
ونقلق ليه
لما كل الدنيا وقفت
ضد منك كنت كلمتك
الجميله
والزمن يشهد عليّ
كنت فرد بوزن عيله
كنت اطبطب رغم ضعفي
كنت شايلك فوق كتافي
جيت في صفك رغم صفي
سيبته لاجلك يمشي حافي
شوفنا فيكي …
كون مرائي كون منافق
كون مُغطى بكل زيف
كون بيقتل العصامي
واللي غاوي يعيش شريف
ليه تخلي الحرف يكتب
إن قلبك كان كفيف
ليه وليه وغُلبنا ليه!..
والسنين
السنين بتلف بينا
كل حلم وتاه مجاش
قفلوا أبواب المدينه
طَلَّعوا الآمال معاش
عاش ظلام سادد عنينا
زاد مفيش…
عفه ف قماش!
حاجب الهم اللي فينا
عن عيون ألباب غَواش
اللي يوجع !!
إن حرفي مال بسببك للكآبه
ذنبي إيه بس اني اسمع
صرخه في موسيقى الكتابه
وبرتابه وبخيابه
كل ده في سؤال موجه
ليكي..
ليه كتروا الغلابه ؟!
صمت حُبك شق فينا
جروح عميقه
كان في نفسي تعلميني
أفهم ازاي الحقيقه
مش تقولي ف صغري إنك
كل شئ بالنسبه ليٌَ
نظري يكبر أشوف ملامحك
فيها دنيتنا الشقيه
والبقيه سراب يحطم
كل خطوه بتسعى لُه .
حلمنا الأكبر بيصغر
إتحصر في اليَك دُه
عمرنا متعاش كدومينو
حتى في المكسب خُساره
والولاد إزاي يآمنوا
بصبح بيفوق بالسيجاره
سمعينا جواب حقيقي
واكتبيلنا بخط واضح.
فهمينا إحنا مين وازاي وليه
وضَّحي أسباب وجودنا
في الحياه ..
قولي لِاْصحاب الكراسي
طبقوا شرع الإله
عرفيهم
إن بس العدل وحده يكسي أرواح العُراه
فهميهم إن قلبك قبلة الشوق والصلاه
بيّني خوفك علينا وانتي قادره تقولي
آه
آه تطبطب ع المواجع
آه تطمن قلب راجع
يوهبك بهواه مراجع
تحكي عنك إنتي مين
إنتي حلم الشقيانين
فوق رصيف شط الزمن
إنتي ذكرة عاشقين
عرفوا إيه معنى الوطن
إنتي ترياق الأنين
والفؤاد المؤتمن
اللي رضعنا الحنين ..
كله عارف إنتي مين
إنتي وهبه من اللي خلقك
ربنا خلانا أهلك
نسعدك ونصون مراكبك
إيه بقى اللي مخلي قلقك
يخلق القلب الحزين ؟!!
مسعد البحراوي
التعليقات مغلقة.