وهات الشعر م الاول
بقلم الشاعرة عبير عبدالمنعم
وهات الشعر م الاول
وضفر لي لياليا
وسكن ضحكنا نجمة
تلالي وتضوي في عنيا
تزغلل في دموع قلبي
وتطوي الحزن في ايديا
عشان ارسم ورود ورموش
واكمل فرح معرفتوش
واكسر زيف ملوش اخر
واسافر بالخيال مترين
بدال الجبر الاقي اتنين
فهات الشعر م الأول
وكام نجمة وقمر سارح
على ذكرى وما تطول..
ده فجر عينيك مجرجرني
اشد الحلم واكافح
واغنيلك على عودي
ياريتني عشقت عامنول
فهات الضحك م الأول
وصبر خوفي في ضلوعي
انا حالفة حروفي تعيش
ومش حابة السكوت يمشي
وبرسم للحياة الوان
ولو فاهمة مبسألشي
مسائل حلها واجب
وتانية حلها سنة
وتالته قتلها جايز
وانا إجابة مبطلبشي
لانك في الاساس عمري
دموعي دعوتي وكلي
ووردي ووِرد انا حباه
ولهفة روح أنا بلقاك
ندايا اللي طريقي معاه
وياسميني ووكمان فلي
يالحن قصيدتي ودلالها
وعين قلبي واحوالها
بقولك كام سبب واضح
على نبرة حنان طارح
غلبني الشوق وغلبني
فهات الشعر م الأول
التعليقات مغلقة.