و إيه تاني يا عم الموت بقلم بكري جابر
وايه تاني ياعم الموت ؟!
وليه طبعك كده قاسي ؟!
لا مره نسيت …..
ولا جتنا كده تواسي
عاشق ليييييه تفرقنا
وتبعد فينا بالمشوار ؟!
مرار في مرار تملا الكاس وتسقينا
وعاشق بس توجعنا و مآسينا
ياعم الموت
ماليها حساب ولا تقدير
بتاخد مننا الغاليين
بدون إنذار و لا تفسير
أغلى الناس … !
أحلى الناس … !
ف وش الريح بترمينا
شجر نشفان ملوش أغصان
و لا ضِلٔه
جرالك إييييه
ما تهدى شوية …. كلت الناس
و لا بتشبع
وميييين يشفع ياعم الموت ؟!
أبيع عمري و اجيبهولك ؟!
حبيب
و صديق
و نعم الجار
ده غير امي
و يااااا همي
ما سيبت ليَ دار و لا ضله
تحمي القلب من الأيام
من العِلة
وياااا عِلة قولي له خلااااص
تعبنا فراق و بعد ف بعد
مش طايقين ياعم الموت
فراق تاني
سفر تاني
يا تاخد قلبي و تسافر
يا إما انك ترجعلي…. عيون القلب
التعليقات مغلقة.