و بعدهالك يا دُنيا… قلم أسـمـاء الـبـيـطـار
يا عُمر سنينك ليه متضايقة و أيامك جوه قمقم محبوسة
مع إن حبال الصبر جواك مش دايبة
لكن بقيت في حالة عدم مش مفهومة
و بقيت زي تمثال شمع .. جواك قلب بيدق لكن كل يوم ف حال !
و جوه روحك فوضى عجيبة كنت زمان بقف لها بالمرصاد .
لكن الظاهر خلاص الدُنيا فاقت علينا
و اللي كان لينا و مر مرور الكرام ….
عدى خلاص .
فاضل بقى اللي عليناااا
ياااا عُمر
كنت ماشي واحدة واحدة
فجأة لقيتك واخدني ف سكتك
جابدني من طوقي ونا مش حِمل جبدتك .
و كله بقى ورا بعضه و من غير حتى فاصل
ثم نعود !!
يااا عُمر
كنت غالي ف وجود أحبتك
لكن دلوقتي خلاص بقيت زي قلتك ليه بتقسى علينا كدة مرة واحدة
و لّا يعني علشان خلاص راحوا الحبايب
اللي كنا علي دعاويهم بنتسند .
لكن نقول الحمد لله على كل حال إن النَفس اللي فاضل فينا للدعاء
ما خلاص الحال إتبدل و إحنا اللي بقينا ندعي ليهم
بالرحمة و الشفاء .
حالك يا دُنيا بقى فوق إحتمالنا .
مُجرد خاطرة ..
التعليقات مغلقة.