و لعلها الباقية للقلوب
بـ قلم أسـمـاء الـبـيـطـار
ربنا خلقنا و خلق في كل واحد فينا مَلكه خاصة يعني موهبه طاقة جوانا يمكن ما نعرفهاش دلوقتي و يمكن نكتشفها بدري
و الـطـيـبـة ايوه زي ما قرأتها كده الطيبة ملكة خاصة جداً ربنا وهبها لبعض من عباده اكيد مش كلهم .
و بستغرب جداً لما بلاقي أم بتعنف حد من اولادها انه طيب و خيبان و بينضحك عليه و مش هيعرف يعيش في الدنيا بطبيعته دي !!
للأسف إحنا دلوقتي بقينا في زمن محتاجين فيه القلوب الطيبة و الرحمة و الكلمة الحلوة اللي تخلينا نقدر نكمل رغم كل مصاعب الحياة
ابنك و له بنتك اللي ممكن تضربيها على طيبتها دي ممكن هي بعد كده اللي تخلبكِ تتحملي بيت بحاله علشان خاطره أو خاطرها .
اكيد مش كل الولاد عندك زي بعض مش بنفس الطباع مش نفس الحنيه مش نفس الأحساس .
و اكيد كلنا سمعنا كلمة ..
انت اللي مصبرني على العيشه في البيت ده .
و لحد ما يروحوا بيتهم و يبقى ليهم حياتهم الخاصة هيفضلوا الايد اللي بتطبطب عليكِ و على ابوهم و على الدنيا كلها
الطيبة دي نعمة كبيرة و ملكه خاصة جداً جداً جداً اوعى تقسيه من صُغره لعلها الباقية في زمن بات الأحساس فيه نعمة .
التعليقات مغلقة.