يااهل المحبه…بقلم مسعد البحراوي
قالوا المحبه وطن
أنا قلت أيوا صحيح
منها الكلام يتفتن
وينقي بحر مريح
يسرح في جَوُّه البدن
يظهر عليه تفاريح
الحب شط وسُفن
وقِبله ماشيه صحيح
الحب دآء المِحن
بيسد باب الريح…
وجسوره لو تمتد
م البحر للمينا
ترجع خيول المجد
ترسى ف مرآسينا
إشهد يآمينا علينا
الصبر قوافينا
لا الحب قادر يجينا
وبحورنا شبعت مد
رتل يانهر المحبه
أجمل معاني الود
اللي وضعها الأحبه
الجد تِلوَ الجد
القصه مكانتش صعبه
القصه حسوا بجد
والأرض واسعه ورحبه
ماضاقتش يوم على حد
وحق مولانا الأحد
الكون يساع أكوان
من يوم ما آدم اتوجد
كآم أمه في النسيآن؟
صراع×صراع ياريت بتدوم
عشان تِوجد سبب لصراع
دي ماشيه بقدرة القيوم
لا نافع جاه ولا أتباع
وبالنسبالنا فص الثوم
يداوي كتير من الأوجاع
شراع الصبر مش مقطوع
لكن زعلان من الأوضاع
ضميره لافيه عتاب ولا لوم
وراضي يكون من الأتباع
لكن امتى هيبقى سعيد
وييجي بكره جايب عيد
ليه زحمه وكله ماشي وحيد
وكله غريق على الشطئان
ليه الضمه بقت تشديد
وصورك باهته في القضبان
ونون شبطت في خانة الكيد
فطرحت خيش بدل رمان
وفاء مبقتش هي وفاء
ولا إسما على المعنى
دا مَثلاً إن ذكرنا آلاء
يرد الرقص والمغنى
وزمن الصدق كان ياما كان
مسعد البحراوي
التعليقات مغلقة.