يااهل الود شعر /مسعد البحراوي
ياناس الود راح على فين
وفين رجليكوا وخداكو
ليه ترشقوا بعض بالسكاكين
تعادوا الكون وأفلاكه
أخوك صاحبه على عيبه
مسير الوقت هيجيبه
متستعجلش و تسيبه
حياتكوا هتمشي وياكوا
يابنت الناس ياإنسيه
ياضلع أمان وحنيه
يامنجم ل الرومانسيه
ليه بس قافله شباكه
ياجار جاور ولا تجورشي
في حب الخير حاول تمشي
وللأحزان متسمعشي
يسوِّيها اللي سوَّاكوا
ياصاحب صاحب اتصاحب
على اللي الحق بيصاحب
ياألف تحيه ومراحب
على اللي ضميره أملاكه
التعليقات مغلقة.