يابا_العمده… طرفة لزين ممدوح
الزمن اتغير يا جملات
ليه بتقول كده يا مرزوق
امبارح قامت خناقة على تفاصيل الجواز فى دار أبوك اسماعيل
ازاى احكيلى
_ قاعدين يتفقوا على
إيه اللى يجيبوا العريس .وإيه اللى على العروسة.
كل حاجه يا مرزوق من قديم الأزل معروفه. كل واحد عليه إيه
كله كان ماشى تمام.أول ما قال أبوك اسماعيل قال الرواتر على العريس.
اعترض الوله.وقال لا يابا عليكم انتم!
والصوت عِلِى وجاب آخر الشارع
دى مشكلة العصر صحيح.
وبعدين ايه اللى حصل.
قالوا نجيب حكم بينا.وكلهم اتفقوا الأستاذ مرزوق معاه الإعدادية متعلم ومتنور.
_ المهم روحت سمعت من دول ودول.
قلتلهم بصوا الرواتر على العروسة.
.هاج أبوك اسماعيل وعروقه اتنفخت.
بس انا أقنعته.إنه كفاية عليه اللى جايبه
احنا نشيل طقم الحلل من الجهاز.
كده كده الطبيخ معدش حد بيطبخ زى زمان .
الأسعار ولعه يابا الحاج..وكله مقضيها بطاطس.
لازم يا مرزوق يعنى تنكش واحنا مالنا
دا واجب على يا جمولتى.
واتفقوا على شيل طقم الحلل.وشالوا كمان طقم الفناجين والفوط كفاية فوطتين مش لازم 80فوطه.
والعريس بعد كده هو اللى هيشحن الباقة
لان كل حاجه بعد كده على دماغه.
_فعلا الزمن اتغير يا مرزوق
زين ممدوح
التعليقات مغلقة.