يابا العمده… طرفة لزين ممدوح “الشيف مرزوق”
اسكتى يا جملات مش لقيت شغلانه الحمد لله
شغلانة إيه دى الدنيا حالها واقف.
لأ دى كتير قوى الشغلانةدى. التلفزيون بالذات مليان بيهم.تفتحى القناه دى تلاقيهم.تروحى هنا تلاقيهم.ليل نهار
تقوليش مفيش ف البلد غيرهم
هتشتغل شيف يا مرزوق. يا الف بركة.
و قناة إيه اللى رضيت بيك.
قناة ست أبوها الفضائية!.
وعايزك تقعدى قدامى دلوقتى .. علشان أعمل بروڤه قبل ما أطلع هوا
قعدت أهو ربنا يعلى مراتبك
_سيداتى آنساتى يا كل ست أبوها بتتفرج علينا دلوقتى
عايزك تسيبى اللى وراك وتستمتعى بحلقة جديدة مع الشيف مرزوق
وو
مرزؤكو مى ف مى!
كل سنه وانتم طيبين
وبمناسبة ما احنا داخلين على أيام مفترجه
ناس كتير كلمونى يا شيف مرزوق عايزينك تقولنا على طريقة عمل محشى خلاط.
خليكم معانا هنطلع فاضل صغير وراجعين.
يا مرزوق اسمه فاصل
يا بت عارف .المخرج مصمم أقول فاضل علشان الناس تبقى عارفه مخرج البرنامج
ورجعنا لكم
جاهزين يلا
طريقة عمل محشى خلاط
*كرنبايه وسط
*كيلو ارز أبيض بلاش الألوان
- شبت حبيبى شبت قلبى شبت روحى
حزمتين شبت و2بقدونس
*3بصلات ونص من بتوع السنه دى بلاش الخزين.
*كيلو لبن المراعى
حد يسألني ويقول يا شيف مرزوق
لازم المراعى. أقوله اه وكمان يكون خالى
لأن خالى مواصينى بكده!.
بعد ما نسلق الرز
مين معانا
الو
مدام ديدى بتكلمينا منين يا ديدى من عزبة أبوعلى
دا نجاح لينا وللبرنامج صوتنا يوصل للعزب والكفور طلباتك يا مدام ديدى
شيف مرزوق كلنا بنحبك.وبنحب وصفاتك.
ياى كلها جامده آخر حاجه
أكلنا كله من حاجاتك الجميلة
خلاص بطلنا طبيخ الملوخية والكلام بتاع زمان ده
الدنيا اتطورت حضرتك .. اوامرك يا ست الكل اخر مره قلتنا بلاش تقفوا قدام الفرن فترات طويلة.علشان تحافظوا على جمال البشرة
أنا دلوقتى بشرتى بقى شكلها وحش قوى قوى
يا ريت تقولى أعمل إيه
_بعد ما سلقنا الرز
نضرب الخضره مع الكرنب فى الخلاط
والرز كذلك الأمر
وسؤال مدام ديدى
قبل ما تدخلى مطبخك حطى زبدة كاكاو.
وكريم فيرى اند لاڤلى.
وبعد ما ضربنا كله فى الخلاط.
نبدأ نعمل صوابع المحشى زى الكفته كده
ونحطها فى صنية وتكون مفروشة حبة زيت.ويا سلام لو من زيت التموين.وتدخل الفرن 25د وبألف هنا.
أحب أقول لكل ست أبوها بتشوفنا حافظى على جمالك ورشاقتك حتى وانت بتغسلى المواعين.
وده سر حب الناس لمرزوق
وأوعى تنسى شعارنا
جمالك أهم من الطبيخ!
ملعون أبوه يشترى أكل من بره ان كان عاجبه
ونشوفكم بكره
فى حلقة جديدة
مع مرزؤكو مى ف مى!
تعالى هنا قولى مين ديدى دى اللى كانت مايعه فى كلامها معاك.
دى بروفه.ملهاش وجود يا جملات
_لاء مش سايباك الا لما تقولى فيه إيه بينك وبينها.
…………………..
التعليقات مغلقة.