يابختَك ياصاحبى …
أحمد كريم
يابختَك ياصاحبى
عايشها مصاحبها
وقادر تاخدها
فى حُضنَك تمام
بتقدر عليها
وعارف مافيها
وقارى سطورها
وكل الكلام
تحاول تعاكسَك
تقوم انت نفسَك
مغيَّر مسارَك
وتمشى ف طريقها
بكل انسجام
بتقدَر تدارى
جروحَك فى قلبَك
وترسم سعاده
يشوفها اللى شايف
يقول ياسلام
تقابلَك حبيبتَك
تبُص ف عينيها
تقول لَك بَحبَّك
تسلِّم عليها
وتنزل غرام
يابختَك ياصاحبى
ياريت ابقَى زيَّك
أخَبِّى وادارى
ماكُنتش هاعانى
ولا اكتب كلام
التعليقات مغلقة.