يابهية…بقلم أشرف الشناوي شاعر عامية البرامون المنصورة
يام طرحه وجلابيه
خفي ايدك حبه يامه
الغلابه مستويه
اللي عاشوا وداقوا خيرك
هما دول البلطجيه
واللي دابوا حب فيكي
باشوا من كتر الاسيه
يام طرحه وجلابيه
هزي غربالك ونقي
خلي صبحك فوق كتافك
نفسي اعرف بس حقي
حقي اعيش زى الخلايق
زى ماخد برضه هدي
هدي حبه الجرح واصل
فضا م الاكل الحواصل
يابهيه جعنا جامد
والحمام عالأرض بايض
يابهيه ليه نقايض
والعيال صبحت دموعها
بحر غرق في الاماني
راجعي تاني الحسبه تاني
يابهيه الليل دا طول
ارمي حبة نور علينا
يابهيه الكحل حامي
واللي حامي مش حرامي
يابهيه الجلد شقق
بلي ريقنا بحلم أخضر
ليه تسيبي الجرح يكبر
الحيطان نشعت وجايع
يابهيه دول حبايبك
مش بضايع او ودايع
ارمي حبل الفجر لينا
يالا جايز تلحقينا
او تلاقي الحلم فينا
الطوفان غطا السفينه
ارمي حبل الود جايز
ايوا جايز تلحقينا
يابهيه ………………
التعليقات مغلقة.