يادنيا ليه…شعر السيد الشيتى
الشمس طول مافى بشر
نورها لايمكن ينطفى
ولا القمرينسى طريقنا ويختفي
ليه إختفت فينا المروءه والشهامه
يادنيا ليه نسيت عيونّا الإبتسامه
فين إختفى الخِل الوَفى
النخوه ليه هانت علينا
سيبناها ضاعت وإرتضينا
الظلم ليه أصبح عَفى
الصبر عايز صبرتاني يصبره
والليل وحيد
مش لاقى حد يسَهَرُه
كم قلب من حزنه إنكسر
مين يجبره
يادنيا ليه للظلم
دايماً تهتفى
يادنيا ليه العمر فيكى
بيتحرق أو يتسرق
والعدل فيكى يادنيا
حبر على ورق
شايفه الحقيقه زى نور الشمس
ليه بتزيفي
يادنيا ليه بيبدلوا
نورك بنار
والفجرقبل مايتولد
ينسى النهار
ورجع قابيل يقتل هابيل
خسه وعار
يادنيا إمتى هتكتفي
يادنيا ليه
فيكى قلوب إتحجرت
وكل شىء صافى قابلها عَكَّرِت
شمس الحقيقه فى عيونك أنكرت
يادنيا من إمتى الغلابه بتنصفى
التعليقات مغلقة.