يادُعاة الإنسانية…شعر السيد الشيتى
يادُعاة الإنسانية
يارُعاة سفك الدماء
المجازر هىّ هىَّ
فين حقوق الأبرياء
قصدكم تمحو القضيه
تمسحوا اصل الهويه
من فلسطين الأبيه
بالخيانه والدهاء
إنسعرتوا من الهزيمه
واستحلّيتوا الجريمه
كنتوا فاكرينها وليمه
دمكم كله رياء
المشافى هدتوها
والجوامع تهدموها
والكنايس تخرسوها
والطفوله بتعدموها
مانتوا ادمنتوا العَداء
تقتلوا بالليل
ويفضحكوا النهار
وبتعشقوا الموت
بالقنابل والحصار
وبتخرسوا صوت البراءه
ف الصغار
بكره تدوقوا وتشربوا
كاس المرار
ياقلوب خبيثه أشد
أسوه من الحجر
ليه تقتلوا حتى
الطيور فوق الشجر
انتوا استحاله تكون قلوبكوا قلوب بشر
بكره نشوف فيكوا
البلاوي والعِبَر
صوت الدمار ميهمهوش
شعر وكلام
دا ال يحب الدم
مايحبش سلام
ياريت كلامى يرفع الطفل
ال غطاه الرُكام
أو يسعف ال جروحه
مش عايزه تنام
ياصوت المجد والعزه بناديكى
عدو الله ياغزه
طمع فيكى
عدالة الأرض مُهتزه
خلت بيكى
دا عين الله ياغزه
هتحميكى
غزه ياطفل بيندبح
امله يعيش
ياقلب أب جروحه يوم مابتنتهيش
ياهَم أُم الحزن سَجّانها
دفنت ولادها
وساكنه احزانها
يا نبض شعب بيدبحوه
يتمنوا مره يركعوه
ودا شعب زي الصخر
عمره مايوم يلين
صابر وشارب م العدو
مُر السنين
ولا يوم لصوت الظلم
عمره يستكين
ولاعمره يركع
غيرلرب العالمين
ياقدس ياأقصى
بتقتلنا الإهانه
الفرح ف عيونا خيانه
ضحكنا ونومنا خيانه
حتى يومنا وامسنا
ذل ومهانه
غزه ف قلوبنا امانه
التعليقات مغلقة.