يارب دبرها …
بقلم وحيد علي الجمال
( يارب دبرها )
عِد الفلوس مرة
طب تاني بالمرة
يمكن اكون غلطان
زَوِّد كمان صُرة
واكسر كمان جَرَّة
أصل الحياة مرة
والدين بقى قنطار
مالها بقى الدنيا
نفسي آخذ منها
واقوم بقى شبعان
كل اما اقول هانت
وامسك في أحضانها
القى الطبيخ حمضان
هيا مابتهونشي
ابدا ولا تجيشي
الا على الغلبان
عاوزة كمان فستان
وشنطه وبلوزه
يارب دبرها
استر وسَتَّرنا
ولا نشتكي مرة
من شدة العوزه
مش طالب انا فيلا
ولا شقه في الساحل
ولا عيشه مرتاحه
عاوز انا دخلي
يبقى كما صرفي
وابات في يوم شبعان
سعر الحاجات فى السوق
نارها تجيب الموت
يارب انا تعبان
طول النهار شقيان
خيري كفى شري
حملي على ضهري
لا بشتكي حالي
واقف على بابك
اجبر بقى كسري
قالوا الوطن عاوز
اديته بالغالي
ابدا مافكرتش
اني أشيل واكبش
واقول انا مالي
مصر لها دمي
والشدة هتعدي
نفسي ولو مره
تعطف على حالي
انا اللي كتفي سلاح
فى الأصل انا فلاح
وقت أما قالت آه
قدمت انا روحي
جوه الكفن امى
فردت لها فدان
غنت على روحي
ابني الشهيد غلبان
اصل الشهيد مش بس
كل اللي مات في الحرب
فيه غيري ميت مليون
ماتوا ف ترابك حُب
وحيد علي الجمال سرس الليان محافظة المنوفية جمهورية مصر العربية
التعليقات مغلقة.