يارب…. شعر السيد السيد الشيتي
المحلة الكبرى
يارب نَزّلت البلا
واحنا ارتضينا
طمعانين فى رحمتك
تنزل علينا
لو تهنا عن سكتك
مين ال يهدينا
أو ضاع طريق دنيتك
مين ال يأوينا
فارد جناح رحمتك
خيرك مغطينا
لاالشمس مره نست
تطلع تدفينا
ولا النجوم ف السما
نسيت ليالينا
ولامره نور القمر
خاصم اراضينا
مين ال صان نعمتك؟
مين الشكور فينا؟
ضلينا عن سكتك
كتروا اعادينا
فرَّق قلوبنا الطمع
وكرهنا بعضينا
وعمانا حقد النفوس
نشر السموم فينا
ونسينا نور رحمتك
تاهت خطاوينا
“فيروس” ضعيف هزنا
ضيع اهالينا
سرق الأمان مننا
خنق الحياه فينا
يارب فى أرضك شيوخ رُكَّع
وطفل برئ بيبكى
نظرته بتوجع
وقلوب بتصرخ ألم
ومفيش ودان تسمع
وذنوب عبادك تغطى الشمس
لكن رحمتك اوسع
دا احنا مين نشكى له غيرك؟
مين قلوبنا ليه هتخضع؟
استحاله نوَّفى خيرك
مهما نسجد لك ونركع
التعليقات مغلقة.