يارسول الله شعر .. السيد الشيتى
بَكَت العروسه الارمله
حزنت على زوجها الرحيم
مكتوب على جبين إبنها
يوم مااتولد يبقى يتيم
كل ال شافه قال لها
شأنه عظيم
آمنه العظيمه أم النبى
أشرف نساء العالمين
كانت العروسه الارمله
أُم الجنين
منها خرج نور النبى
الهادى الأمين
ماشافتش ف ولادته عذاب
مرت ولا مر السحاب
حضناه رعاية ربنا
من كل باب
كان هوَّ نورها وبدرها
وجَت حليمه ترضعه
زاد اللبن فى صدرها
حتى الغنم من رحمته
زاد ف المراعى رزقها
كان يوم ولادته معجزه
وحياته اكبر مَلحَمه
يوم مااتولد باسط ايديه ف الارض
عينه ف السما
كان قلبه زاده الحمد
روحه ملهمه
كان يوم ميلاد المصطفى
أغرب من الاحلام
فارس نيرانها انطفت
واتهزت الاصنام
عطره ملا كل الوجود
وانزاح مع نوره الظلام
يال رب العرش ذاته أدبك
استحاله نلاقى زيك
ف الأدب
يال السماحه والكرم فى مذهبك
علمتنا ننسى الغضب
وَحَدت كلمة أُمِتَك
كانت جسور متفرقه
خلتها حَضَنتت دعوتك
من قلبها متشوقه
علمتها معنى الأمان
لَبِستها توب الإيمان
وهَدَمت بنيان الجهاله والعمى
علمتها ان العداله من السما
كَسٌَرت اصنام الفساد
حررت أفكار العباد
من كل اعداء الحياه
علمتها ان الدنيا
مش سُلطان وجاه
دينك برىء م الغدر والإرهاب
لايحب لون الدم
ولا طعم العذاب
فاتح لرحمة ربنا
مية الف باب
مبادئك يارسول الله مازالت
عايشه فينا
وسيرتك نور
لنور الحق يهدينا
نصلى عليك تداوينا
تكحل بالرضا عنينا
ولو تاهت خطاوينا
هُداك للنور ينادينا
ولو ننساك معاذ الله
تتوه بينا السفينه
التعليقات مغلقة.