ياريتها تعود بقلم هشام الجوهري
يللى نسيت نومتك
أيام زمان كات فين
إزاى أعوم عومتك
وانسى واغمى العين
عن نومة كانت بهدله
الوش ف الرجلين
غطانا هدمة مقطعه
وسريرنا كان م الطين
ولا نسيت المصطبة
ونسيت معاها الطبطبة
من إيد حنونة وطيبة
شايلاك فى نن العين
مغطياك برموش
صادقة مافيها رتوش
طَيِّب ياريتها تعود
وروحها فينا تسود
الضحكة كات من قلبنا
مرسومة ف وشوشنا
فين ضحكتك يامه؟
تزيح عننا غمه
راكبة ومتحكمه
من راسنا للرجلين
التعليقات مغلقة.