ياللي حبيتوا بسذاجة بقلم / أحمد زيدان
قهوة ساده وكام وساده
محوطينك
جالس لواحدك و البراءة
في عز بردك إنما
مدفي نفسك بالحنين
حادث الذكري اللي فيك
بِيُجبرك
و يِجبرك تفضل وحيد
رغم انسحابك م اللي فات
لساك هناك
عايش بتتنفس لقا
رغم اختلاف الامكنه
متسرسبه في صورة محال
لكن جمال الذكريات
واخدك هناك
نُصَك مساك
قصيدة سهله في محتوى
وحدة روحين
او فسحه حلوة و غنوتين
او صورة ذكري لشخص فات
كل الحاجات
حتي تفاصيل الزعل
كانت جميله وقتها
فاكر ساعتها كل شيء
هي شافت فيا شىء
كان مختلف
بس اما عشنا لوحدنا
مااعرفش ليه فينا الحنين
بقى مختلف
خسران رهان دايما معاك
و المحتوي الموجود
أصبح لا يصلح للحياه
اتبدلت كل الحكايه
بين كان وكنا و كان معايا
فضلت وحدى بعيش هنا
و معايا دايما قهوتي
و مخدتي
عليها ذكري من هناك
التعليقات مغلقة.