ياوطن حقك عليا بقلم اشرف الشناوى شاعر عاميه البرامون
ياوطن
ماتت عصافيرك
ع البر ع الشط
فى الميه
ياوطن
نسبة نجاحك
صفر فى الميه
ياوطن ميت
مالوش ديه
طفش الحمام
م الغيه
انا الميت
والا انت ميت
فيا
ياوطن
غنى كمان اغنيه
غنيلى قوم
ياوطن
واقفلى فى عنيه
سايبك خلاص
ياوطن
طول ماانت
مش ليا
ياوطن ماتت
عصافيرك
ع البر ع الشط
فى الميه
ياوطن بحرك دفا
مارضيش يكفني
رماني ليك ياوطن
بالغصب من عني
ارضع ف بز رملك
وافتكر امي
صعبان عليك ياوطن
قوم وكفني
انا برضه منك ياوطن
وإنت ياوطن مني
ياوطن قلبك
مافيهش حنيه
حِلمك شوية
وانا الغرقان
في بحر
من غير شط
ياوطن
نازل عن الخط
كان نفسي أكبر
وابقي فيك حاجه
ياوطن قهوتك ساادة
ياوطن دايس
علي النوار
لساك بتحلم
تلقي بعدي نهار
ياوطن
ماتت عصافيرك
ع البر ع الشط
فى الميه
ياوطن حقك عليا ..
حقك عليا!
التعليقات مغلقة.