يا أبو لاسة وعمة وجلابية
بقلم…. سيدة القصاص
يا شايل همَّك على راسك
وبتنعي ف أرضك فين فاسك؟
أيامك عدت يا حبيبنا
كما “قطر” ف سكة بيدهسنا
مش كنت صراحة ملبسنا
م القطن المصري اللي جفانا؟
فين راحت جودة قماشتنا؟
ودهبنا وبيضة فرختنا؟
اللقمة ما راحت لذاذتها
والفرحة الغربان أكلتها
والشمس بتنعي على البقعة
الفاضلة وحالفة بغلاوتها
كان خدك فدان “بطيخ”
والخد التاني “فرولاية:
كات إيدك “تشلب “تسابيح
وجبينك للحُب دوايا
فين هيا مزازة أعنابك؟
وعصاك اللي بتحمي جنابك؟
واللبن الصافي وزبداته؟
على وش الحلوة البكرية
والمكن “الخَض: اللي شكانا؟
والغية العاشقة الملاغية؟
و “حنُّورِة”فاطمة “وبتَّاوْهَا”
الراقص فوق “البلاطاية”؟
بيْرُمْ العضم بدفا قلبه
ومعاه كام “قوطة”و”خَسَّاية”؟
فين “راكْيَة”الحُب مِلَهْلبْها؟
و “كوبَّاية”شاي حلوة ريحتها؟
و”دُرَاك” المشوي على شعورك؟
والمتعة ف حسَّك حلاوتها؟
كان فجرك صاحبك ومخاوي
كات منك “بتنز” تقاوي
لرجولة عظيمة… بشمْخِتها
و”قَنَايا “بتضحك مَيِّتها
وحشتنا أيامك فين هيَّا ؟
يا ابو لاسة وعمة وجلابية
.
التعليقات مغلقة.