يا إنسان بقلم الشاعر محمد الشرقاوي
ولسه مصر يا إنسان
تسيب العمر في التوهان
ومش غاوي
ومش ناوي
تقول أسف أنا غلطان
وترجع من طريق الشر
عشان عمرك ما هتكون حر
إذا سلمت يوم عقلك
لإيد شيطان
رسمت حياتك الجاية
بنيت في قصور على الميه
حلمت بدنيا وردية
لقيت حسرة
وجبال أحزان
مشيت في صراع ما لوش أخر
دخلت كهوف
سافرت كتير وبتسافر
ومش بتشوف
قتلت ضمير
بقيت شرير
وبتجاهر وبتجادل
وعندك للذنوب
تبرير
ولا عمرك تقول سامع
لرب الكون أنا خاضع
بقيت تايه
ومش راجع
لفعل الخير
ومع غيرك تقول وتقول
نصايح شرحها بيطول
وساقط جوه دوامة
ولا بتسمع
لأي حلول
وفاكر دنيتك هتدوم
ومش هتموت
تكون ظالم تقول مظلوم
بعلو الصوت
وخنت العهد مع ربك
ومات من غفلتك قلبك
ويوم الحشر هتلاقي
ملامة وحسرة مع صاحبك
ولا عاد البكا ينفع
ولا حتى تقول ندمان
ومش ممكن رسول يشفع
لواحد خان
شوف يا عاقل يوم ميلادك
كنت إيه ؟
شوف كمان الأهل قاسوا
قد إيه ؟
حكاية أضعف من ذبابة
وصورة من قصص الغرابة
واما جات أيام شبابك
ليه عملت الدنيا غابة ؟
نصيحة لنفسك الحقها
وكلمها وفوقها
وعلمها كلام ربك
جمال الذكر دوقها
نعيم الدنيا في الطاعة
نعيم الأخرة في الطاعة
لأن النفس طماعة
في كل زمان
لكن لو لحظة بتفكر
تعيش في أمان
طريق السعد قدامك
هنا بستان
يا عم الناسي ليه رافض
تعيش إنسان ؟
التعليقات مغلقة.