يا بحر بقلم أشرف الشناوي
يابحر
رامى المحار
والصدف عالبر
وبنرمى فيه
الوجع
لما الوجع يخضر
والكل شال
شكوته
على كفك الواسع
وشوشنا فيك
الودع
طلع الودع سامع
تغسل نجوم
السما
موجه ورا موجه
تحضن قلوب
البشر
فى الزحمه
والهوجه
نغسل هموم
عمرنا . ونصفى
احزانا
تقفل اوام جرحنا
وتاخدنا عالجنه
ننسى الجراح
كلها
وترد احلامنا
يابحر فيه العجب
نايم على الشطين
شايل مراكب هنا
ماشيه على الصفين
وناس بترمى الشبك
والرزق عاالمولى
والكل شاف الرضا
بالقدره والحولا
يابحر فيه السمك
زى الصدف الوان
والكل خاد حصته
من كفة الرحمن
لافرق بين البجع
ولا امة الغربان
كل الخلايق هنا
تاكل وتتبحبح
حتى المحار والحجر
للرب بيسبح
يابحر فيه العجب
عادب على مالح
الكل لبى الندا
واحنا اللى بنئاوح
يابحر رغم الغضب
ترجع وبتسامح
ترمى المحار والصدف
وبتنسى فى امبارح …………
اشرف الشناوى
شاعر عاميه
البرامونيا
التعليقات مغلقة.