يا بهية سماح …
بقلم أيمن رضوان
يا بهية سماح
…………….
لسة
عَالْمَدْنَةْ هلال
ولسة الودن تعشق
هدير السواقي
ومهما طال ليلِك ياطوبة
الشمس لازم ، هتحضن فيوم
أرض الشراقي
واحنا عيال كنا ننام
من بدري لكن
قلب الصبية عاشق عنيد
للضي فاتح جواه مساكن
حلمان فيوم
فارس شديد ، رغم الوعيد
يخطفها فوق عند النجوم
ولمَّا تقوم ، للشمس رايحة
تغزل ضفاير ود وحنان
تعملها حِرْز ، يحمي الولاد
من شر ساكن كل الاماكن
جوا القلوب طرحه يبان
فتقوم وترمي الفرحة سقايل
توصل لحدو شط الامان
وزرع المحبة يكبر ويبقى
أشجار تضلل ، مَحْلَى الحيضان
و تفضل تدادي ، وتعمل مداوي
تطبب قلوب
فتزول قوام
أشباح ضعيفة ، أيوه كفيفة ورغم ذلك
كانت بتسكن نني العيون
غصب عنا شادة الجفون
واتداري منا ، شمس النهار
فنشوف حياتنا ، بدل الخضار
نشوفها سودة ، ومن تاني عودة
لعهود ظلام ، فمن غير كلام
تبعت رسايل ، ل ابو قلب مايل
يرجع من تاني يُصْدُقْ وعودْ
او حتي يعودْ
من تاني ليها أحضان بهية
وهي هتنسى كل اللي صار
مهما يكون قلبه دا قاسي
أو حتى ناسي
بهية دا هيَّا ، دايما تقول
أوعى تلوم
على قلب عاشق
لو شاف بعينه ، سارق سنينه
وبكل ود ،، قاله سماح !!
أوعاك فيوم تلوم عليه !!
أصل الغرام يبدل مشاعر
من كره شادد ، حبل الوجع
من هم ساكن ، قلب الجدع
لبحور حنان ، تطرح امان
تداوي جراح
لو تبقى عاشق
رح تبقى شاعر
للكون بتعشق ، فيه البراح
حتى اللي سايب ، جوا في قلبك حبة جراح
ممكن بنظرة دافية رضية
على طول هتنسى
كل اللي راح
يبقى محدش ، عليها يلوم
الحلوة بهية
لو جت فيوم
وقالت سماااااااااااااااااااااح
…………………..
شعر / أيمن رضوان
التعليقات مغلقة.