يا ضحكة مصر فينك
بقلم عبير عبدالمنعم.
ما تعودي ياضحكة لينا
من غربتك
في المواني..
من هجرتك للوشوش
من رسمتك
ع المعاني..
لليل بلدنا …البشوش
وصبح عرقان..
يعاني
تداري حزن العطاشي
وتسقي…
خد الأماني
ياضحكة عودي وفينك
يا تاج شفايف
الصبايا
يا حلم ….ليل الصغار
ياشق قمر ….
العصايا..
يا ضحكة طيفك ما زارني
وبَعدْ لَهُ في….
الليالي
وحشني صوتك ما زادني
غير دمع فيه ……
يلالي
كل الاطبا….. زاروني
شافوا الجراح
ع العيون
جابوا دواهم وجولي
زادنا السكات
ع الجفون
يا ضحكة عشمانة فيكِ
بيكي الشقا
راح يهون
يا ضي…. ليل الغلابة
يا ريق…
لشجر الليمون
يا نبض…. روح الرفاقة
وغيطهم
الدافي الحنون
ياضحكة عودي لدارك
ده الكل صامم ..
شِفاته
الفرح غاب من غيابك
نتمنى….
والله شُفاته
ياضحكة سمي وعودي
وانا اغني ليك
بعودي
غصن الولاد مال وعدا
ع المر راميين
ودعهم
واقفين يبيعوا المودة
انتي الدوا يوم
وجعهم
ياضحكة حني وروقي
تعالي….
ضمي الساعات
وتحت….. سقف الغلابة
تعالي…….
حني البنات
ولمي حزن…. الشوارع
ويا البيوت
والحارات
وبنور جمالك يا حلوة
امحي الوجع
من سكات
يا ضحكة فينك تعالي
لمصر ……
ست البنات
التعليقات مغلقة.