يا غربة قلم سامح لطف الله
النعجة ماتت من بدري
مات الوجع بين أضلاعي
هيضر إيه لو سلخوني
شايل همومي بدراعي
لو حتى 100 مرة داسوني
سبت الكرامة ف يوم سبتك
شايل همومي وأوجاعي
الأرض مفروشة زتوني
في كل خطوة اتزحلق
لابس هدومي ومتعري
وألف عين فيَّ تبحلق
هجرت أهلي وإحساسي
شايلة الهموم دايما راسي
ورحت من مينا لمينا
يا هِلْب مش لاقي مراسي
من شطي منزوع حنية
لشطوط بتنهش إحساسي
يا غربة واكلاني وشاربة
قاتلاني من جوة يا ناسي
هعتب على حظي وفقري
على ناس بتسرق من كاسي
هدُّوني وبيبنوا ف قبري
ودقوا مسمار في أساسي
واللقمة باللقمة تعدي
وغموسي يكسر أضراسي
النعجة ماتت من بدري
هيضر إيه لو سلخوني؟
التعليقات مغلقة.