يدور الطنبور بقلم معوض حلمي
فاكرين زمان الريف
قبل الحضاره الزيف
والفحت والتجريف
معادش فيه عصافير
ولاعاد يمام بيطير
لسه الصور قدامي
بتنز إلهامي
أحلامي حفظاها
من عند غيط طه
لمصارف المالحه
معادش ناس سارحه
يرحم زمان الفاس
وابويا ع الملاس
عليه زمال للناس
وعمي كان بيدور
ويايا ياخد دور
ويدور الطنبور
واخويا حالته حاله
بيجري ف المقياله
عشان يجيب الغدا
ويملى صوته المدى
ياهل اللا ويانا
إتفضلوا معانا
دا اللمه خيرها كتير
ونجري ع الصفصافه
ناكل ونتصافى
نلعب كما العصافير
فاكر كمان الدار
والمقعد السهران
والمعجنه والتبن
عايزنها للطلسه
ندهك بها الجدران
والفرن ابو عرصه
يحلى بعيشه الرح
وزلعة السمنه
مدفوسه فوق ع السطح
وستنا آمنه
تصحى قدامنا
تحلب لبن ع الصبح
وتدي لامي خبر
عشان عجينها خمر
فتصحى تحمي الفرن
وابويا كان ف الجورن
شغال بيكسب وقت
لما الفطار يتحط
نفطر ونشرب شاي
وينادي لما نقوم
مين اللي جاي وياي
ع الجسر شرشين توم
قبل العطش والصوم
والغله عايزه الضم
هات الشراشر ياعم
طرح السنابل مال
بقى لونه زي الدهب
نضفنا جورن هلال
بينادي رزق المواتي
ربط يابوي القتاتي
حمل جمال العرب
دا البنت عايزه شوار
والدار دهنها الولد
ونيجي زايدين عدد
ونقيم لنا ماحيا
وندعي أهل البلد
يونس على يحيى
بالذكر يحلى المدد
والندر فول نابت
نلقى القلوب تابت
نلقى القلوب تحيا
التعليقات مغلقة.