يمكن في مشوار ربك يستجيب
بـ قلم / أسـمـاء الـبـيـطـار
لما بنخرج من البيت و بنمشي في الشارع ، أو راكبين مواصلة بنشوف حالات كتير ، و مواقف لا حصر لها و كأنك روحت كل الأماكن اللي شوفتها في مشوار واحد .
ما تبصش بعينك ، و تمصمص شفايفك و خلاص .
أفضل حاجة في المواقف دي الدعاء .
يعني إيه ؟؟
يعني طول ما انت ماشي في أي طريق ادعي .
عديت على مستشفى ادعي ربنا يشفي كل مريض .
شوفت بنت شايلة أزايز ميه من الشارع ووخداها و داخله
مستشفى .
ادعي .. إن ربنا يشفي مريضها .
شوفت عربية ترحيلات سجن معديه ..
ادعي .. ربنا يفك اسر كل مظلوم .
شوفت ست محتاسة و هي بتطلع بنتها اللي من ذوي الاحتياجات الخاصة الميكروباص ..
ادعي .. ربنا يقويها عليها .
شوفت سواق ميكروباص وقف لراجل كبير
و مرضاش يمشي الا لما يقعد مكانه
و كمان ما اخدش منه اجره
ادعي .. ربنا يسلم طريقة .
شوفت عامل نظافة في عز الحر بينضف الشارع
إدعي .. ربنا يقويه .
روحت تشتري حاجات و كانت غالية
ادعي .. ربنا يوسع على الجميع و يراضي كل محتاج .
تخيل الحالات دي أنا شوفتها في مشوار واحد .
و أكيد كل واحد فينا بيشوف حالات زي دي و أكتر .
إلهي نفسك بكل طيب حتى و إنت في ابسط المشاوير .
و متنساش إن دي دعوات بظهر الغيب .
أو خدها من باب زي ما بنقول بالبلدي
اللي يشوف ” بلاوي الناس تهون عليه بلوته ”
هي مش بلوى و لا حاجة هو إبتلاء من الله يخص به بعض عباده
و إحمد ربنا ديماً على النعم اللي إنت فيها .
و إجعل ليك في كل خطوة حسنة .
التعليقات مغلقة.