هتتعدل …بقلم/ عبير عبدالمنعم
هتتعدل
ولو بتنام عشاك احلام
هتلقى الرزق مسافرلك في ضل الريح
هتتعدل
ولو مالك زمام روحك وجع في الغربة
من تاني هترجع للدفا والفرح
هتتعدل
متحسبهاش هتتعدل وطول الحسبة
تمام العرض بلاش الدمع يحرق فيك
خدود الورد
هتتعدل
و احلى ما فيك حمول ضهرك ومتصالح مع دهرك
ولو طال المنى عمره فعمره قصير مع صبرك
هتتعدل
مسير شمس الطيابة تبان بتعويذة ضحكك
المعلوم فتتبسم وتتعشم
ومن حلق المرار هتقوم
هتتعدل
ولو في البعد مشتاق للعيون والروح
هنتقابل ونملا الكون غنا وافراح
هتتعدل
واحكيلك وتحكيلي ونضحك من قلوب
صافية على الايام وبالعافيه
هنتذكر قساها في يوم
هتتعدل
مادام فوق العباد فيه رب هتتعدل وتتبدل
قساوتها لحنية دوام حالها ده امر محال وبالنية
هتتعدل
مادام سعيك لخير وسلام
وجفنك شايل الاحلام
وفكرك يشبهك بتمام
هتتعدل
اصبر ده كل الصبر فيه افراح
واخرة صبرك الاخضر
سطر ملام مع ضحكة تغنيلي
والله احلوت الايام
هتتعدل
التعليقات مغلقة.