لَو تِحسبيها
احمد كريم
لَو تِحسِبيها بالسنين
أنا عُمرى فات
مِش باقِى مِنُّه
غير حِلم باهِت
وفَرحَه تاهِت
أو شُوَيِّة ذكريات
يَعنى بعِلم الحساب والفَلَك
أنا خلاص….عُمرِى هَلَك
أمّا بحساب المشاعِر
وبقَلب شاعِر
القلب لِسَّه جُوّاه حياه
والعَقل عُمرُه أبداً ماتاه
والخلايا الإنسانيَّه بين ضلوعِى
مِن خلال الموت تتوِلِد
تعمِل حياه
والطريق اللى ابتديتُه
ماشى فيه وِمكَمِّلُه
من بدايتُه…لِمُنتَهاه
أنا العَجوز أبو شَعر شاب
وانا الشباب
وانا المُراهِق ابو قلب خَبَّط
علَى كل باب
وساعات اكون عَيِّل بيحبِى
يسنِد ويِمشِى
وِسط الضَّباب
ماسِك فى إيد أحلام حَيارَى
عايش فى حارَه
سُكّان بيوتها حروف بتِكتِب
كلام بيِحكِى
عن طفل ساكِن قلب واحد
سِنينُه عَدِّت
وقَلبُه داب
التعليقات مغلقة.