(كان نفسي أكون )
بقلم سولافا بسيوني .
كان نفسي أكون…
وردة تزين أي غصن.
أو ورقة طايرة
من شجر كان
ليها حضن.
كان نفسي أكون…
طير بيعشق
الحرية سابح في
السما هيمان
ومالوش في
الأرض غية.
كان نفسي أكون…
ريح قوية.
وأهزم الخوف
اللي فيا.
وأزرع بذور
أمل وحياة
في كل شيء
حواليا.
كان نفسي أكون…
شمس الصباح.
وضيي داير ع
القلوب سواح.
يملاها شوق
وحنين ويشفي
جواها الجراح.
كان نفسي أكون…
بسمة حياة.
منقوشة على
وش الزمن.
ولاتتقدرش بتمن.
ولا تعرفش
بعدى الأه.
كان نفسي أكون…
نجمة في سما.
بعيدة لكن ممكنة.
لمعتي تسحر
عيون وقلوب
بتحلم بيا أنا.
كان نفسي أكون…
قمر الليالي.
يسهر على نوري
الأحبة و اللي
شايل قلبه حبة
واللي كان سهران
في صحبة وبقى
في ليله خالي.
كان نفسي أكون…
شجرة في خريف.
أستغني عن غصني
الضعيف وتبقى
نبتاتي قوية.
مايهمنيش ولا
ريح عتية.
مايتسمعش
غيرحفيف.
كان نفسي أكون…
حبة مطر.
أسقى الورود
ويا الشجر.
أغسل هموم
المجروحين
ولا يبقى ليها
يوم أثر.
كان نفسي أكون…
عروسة بحر.
أية في الجمال
والسحر.
وعيوني عيون
المها دايبة في
الرموش السمر.
كان نفسي أكون…
قطرة ندى على
عود خضار.
مشتاقة لطلعة نهار.
وقبل الشمس
ماتصحى جمالي
يخطف الأنظار.
كان نفسي أكون…
أوقات لقا.
لكل قلب داب
م الشقى.
ونبضه يصرخ
م الوجع صابر
ولا يوم إشتكى.
كان نفسي أكون…
دمعة فرح في
عيون بريئة.
تيجي علي غفلة
وتكون جريئة.
تطوي أيام الأسى
وتفتح بيبان الفرح
ف دقيقة.
كان نفسي أكون…
لحظة غروب.
على شط بحر
بتنتهي.
حاضنة أمواجه
في توبي ولونى
قرب يختفي.
كان نفسي أكون
وأكون وأكون.
سهرانه ودبلانه
العيون.
على إيه كنت
وإيه هكون.
وإيه يخلي
الصعب يهون.
غير الاستعانة
برب الكون.
التعليقات مغلقة.