إدورت و إحلوت
بـ قلم أسـمـاء الـبـيـطـار
تاني عنوان غريب !!
لا مش غريب و لا حاجة إحنا بس اللي نسينا شوية طبيعة فينا .
زمان و يمكن قبل جيلي بأجيال محدش فينا سمع عن الرجيم و الدايت
و أدوية التخسيس و عمليات الشفط و الشد
و أنواع جديدة من الأمراض اللي ما كنش حد بيسمع عنها حاجة
و اللي للأسف الشديد راح ضحيتها ناس كتير في بداية دخولها لمجتمعنا و أكيد فاكرين كلنا الفنانة سعاد نصر و اللي حصل لها جراء هذه الجراحة .
زمان كان مقياس جمال البنت إنها تبقى مليانه “عودها ملفوف” بالبلدي زي ما بنقول ما حدش فينا كان بيحط في دماغه لا من قريب أو بعيد حكاية الدايت أو الرجيم دي كلمات جديدة على ودانا بصراحة .
و يمكن اللي حصل لينا ده بسبب تغيير عاداتنا الغذائية التي كانت تمتاز بالتنوع و الوسطية في أصناف الطعام على مدار الأسبوع و الشهر .
كنا بناكل كل حاجة من البيت من إيد أمهاتنا من أجدادنا كلمة أكل بره البيت دي ما كناش نعرفها إلا إذا كنا معزومين عند حد من أهلنا يعني أكل بيت برده .
كلمة مطاعم و دليفري ما نعرفش عنهم حاجة خصوصًا في مرحلة البناء بناء الجسم طبعاً المطعم الوحيد اللي كنا نعرفه مطعم الفطار اللي بنجيب منه الفول و الطعمية فقط لا غير أما باقي الطبلية أو السفرة فكانت من البيت .
الكل كان بياكل دون تمرد على أي صنف من أصناف الطعام إلا نادراً
و لما كان بيحصل كده ما كنش عندنا ثقافة أبعت هات اكل من بره لا كان بياكل اي حاجة موجودة في البيت برده يا رب يكون عيش و جبنة
و كنا بنبقي راضيين و مبسوطين و كان جسمنا صحيا جداً على فكرة لا كنا تخان واصلين لمرحلة السمنة المفرطة ،، و لا رفيعين و عندنا نقص و هزال .
إنما من حوالي عشر سنوات إن لم يكن أكثر تغيرت عاداتنا الغذائية و انقلبت رأساً على عقب !!
بحاول ادور على السبب و بقول يمكن كثرة الفضائيات ؟!
يمكن كثرة برامج الطعام و دخول عادات غذائية غريبة على مُجتمعنا ؟!
يمكن بقينا نستسهل عمايل الأكل و بقى أكلنا كله مقليات و زيوت و معجنات و تجارب مالها عدد على حساب صحتنا ؟!
بقينا نهاود الولاد في رفضهم للكثير من اكلاتنا الأصيلة ؟!
لحد ما وصلنا إلى مرحلة إن البيت بقى زي المطعم كل واحد من الولاد ليه طلب شكل في الوجبة ؟!
و دي نقطة أنا شخصياً بعاني منها حتى لو عاملين أبسط حاجة بانيه
في من الولاد اللي بيحبه سميك و فيه اللي بيحبه رفيع !!!
وصلونا لمرحلة ما فيهاش حاجة بس المهم ياكلوا ؟!
و بالتالي وصلنا في البيت إن كل واحد ليه أوردر ؟!
متعة إننا نتلم على أكله واحده بقت صعبة جداً بصراحة ؟!
تهنا من بعض شوية بس نرجع تاني لموضوعنا
كتير من البنات و الستات بقى عندهم نوع من الهوس إسمه الرجيم و الجديد و الغريب في الأمر إن الرجل هو أيضاً عنده نفس الهوس و من ضمن شروطه في العروسة إنها تكون مش مليانه !
و لو راح اتقدم لبنت من ضمن أسباب الرفض إنها ” تخينه ” بالبلدي زي ما بنقول !
كانت شروط الزواج زمان غير كده و الله أهمها إنها تكون بنت أصل و بتعرف تطبخ آه و الله لازم تكون بتعرف تقف في المطبخ و بيتقال عليها شاطرة كمان الشهادات و الأمور التانيه دي كانت بتيجي بعدين . يعني عاوز ست بيت مش عروسة حلاوة يتباها بيها قدام الناس !
و الأغرب إن في أزواج بيشترطوا إنها ما تتخنش بعد الزواج ؟!!
طيب إزاي بعد حمل وولادة و رضاعة ؟!
لما بيقي في بنات لسه بتقول يا هادي و نفسيتها صفر و من هنا ممكن تؤذي نفسها بأساليب خطأ في إتباع أنظمه غير أمنه لإنقاص وزنها اللي ممكن يكون وراثة اصلاً و مهما عملت ليها عود زي ما بنقول مش هتقل عنه .
عملية السِمنة عملية مُكتسبة مش أصيله فينا لأن زي ما قولت عاداتنا كلها اتغيرت من أنواع الطعام إلى النشاط اليومي اللي كنا بنقوم بيه
كل وسائل الراحة بقت موجودة
من المواصلات حتى لو المسافة بسيطة الناس بقت تستسهل و تاخد عربية !!
للديب فريزر اللي بقى فيه حتى العيش و ما بقينا ننزل السوق زي زمان كل يوم !!
للمكنسه الكهربية للريموت لـ لـ لـ لكل حاجة ممكن تتخيلها منعت عننا الحركة و النشاط
كانوا أهلينا زمان يقولوا ” في الحركة بركة ”
لكن لا بقى في حركة
و لا بركة بعدم رضانا عن نفسنا .
لازم علشان تعيش مرتاح تبقى راضي عن نفسك تمام الرضي مش علشان ترضي حد تقوم تؤذي نفسك بأنظمه ممكن تنهي حياتك بيها و أذكر بنت زميلتنا راحت حياتها بسبب عملية لإنقاص الوزن .
لازم تكون مقتنع إن دي صحتك و لازم تحافظ عليها لأن المعدة بيت الداء فيجب عليك عندما تأكل أن تجعل ثلث للطعام و ثلث للشراب و ثلث للنَفس .
الحالة الوحيدة اللي ممكن تتبع فيها نظام صحي هي فعلاً السمنه المُفرطة علشان خاطر صحتك مش علشان يجيلك عريس أو علشان الصيف طالع و الموضة تجنن أو علشان حد بيسم بدنك بكلام ما لوش لزمه تقومي تأذي نفسك ؟!
حبوا نفسكم يا جماعة ،، خلي عندكم ثقة فيها ،، ما تخليش حد يأثر عليك بالسلب خليك إنت ديماً إيجابي .
و لو عوزين نصيحة ..
الرجيم و الدايت ده مش شهر و لا اتنين و لا حتى سنة .
الدايت ده نظام حيااااااة يعني لازم تمشي عليه طول عمرك .
و لو اعتدلنا في أكلنا و شربنا لا هنحتاح يوم عالمي للسِمنه و لا يوم عالمي للنحافة .
و دُمتم أمة الوسط في كل شئ .
التعليقات مغلقة.