تتمنى يوم يرجع لها

تتمنى يوم يرجع لها

شعر
سيدة القصاص

لسه كلامه ف ودنها…
راحت وراه …عاشت مداه
على نور جبينه.. (اتمخطرت)
نوت الصلاة
راكع بيغرس بالعرق
الحب ف سنين زرعته
يتقام يصلي ع النبي
يفرد غرامة يبوح لها
بحلاوة الأشعار
والطير بيعزف حبهم
واقف بيرقص منتشي
والشمس لابسة (الشفتشي)
وبدُفِّها دقت لها الأشجار
لسه كلامه ف ودنها
وحياة مقام سيدنا النبي
أنا كان فؤادي بيعشقك
يادي الجدع
وعملت على شانك بِدع
لكن فراقك هزني
قطّع تاريخي وبعتَرُه
لسة القمر شاهد على
هذا الفراق.. لم ينقطع
والقطن تايه ( أُشْبَرُه )
و (اللوز) عَدوَّك كَسَّرُه
ما عِدتش أسمع له خبر
راح ف الوبا ويا اللي راح
ما سمعت عنه ف الحشا أخبار
والساقية خاصمت ترسها
والقمح راح ف الإنفتاح
وأنا وإنت شمتنا العِدا
والجرح ناح…
وطريقنا تايه ف السكك
عطشان أماني لجنتك
عصافيره أرهقها البراح
والعمر راااح
وهيَّ.. لسة بتفتكر
أجمل ولد ساكن حصانه
ف ترسها نايم كلامه ف
حسِّها تتمنى يوم يرجع لها
ويعود معاه…نور الصباح…
ويدَشْدِش الأسْوار….

.